La spacmisio al Marso
de
Amri Wandel
La planedo Marso estas eble la plej interesa planedo en la suna sistemo, pro tio, ke ĝia klimato plej similas al tiu de la Tero kaj tial havas la plej bonajn ŝancojn subteni vivon. La "Ruĝa Planedo" jam de jarcentoj ekcitis la imagon de la homaro. Oni povas vidi sur ĝia surfaco formojn similajn al reto de linioj, kiujn oni antaŭe interpretis kiel "kanalojn" - eble konstruitajn de evoluiĝinta civilizacio por konduki akvon. Intertempe la sciencistoj jam de post la unuaj esplormisioj al Marso en la sepdekaj jaroj scias, ke la kondiĉoj sur Marso ne taŭgas por homa vivo - la temperaturo estas plejparte subnula kaj la atmosfero estas tre maldensa kaj apenaŭ havas oksigenon. Ankaŭ akvo ne ekzistas. Marso do estas malvarma ruĝa dezerto.
La misio "Pathfinder" (vojtrovanto) estas parto de pli granda projekto celanta profundan studon de la planedo Marso. "Pathfinder" kunportis veturilon, kiu post la surteriĝo - fakte, surmarsiĝo - forveturis el la patra spacŝipo kaj esploris la grundon de la planedo. La vojaĝo al la planedo Marso komenciĝis la 2an de decembro 1996 kaj daŭris pli ol jarduonon. Unu monaton antaŭe oni estis sendinta alian raketon, kiu orbitas ĉirkaŭ la planedo kaj enhavas sciencajn aparatojn. En julio, preskaŭ koincide kun la UK, ekvenis la unuaj bildoj de la surfaco de Marso - kaj ili konfirmas nian antaŭan scion: temas pri ruĝeta dezerto el sablo kaj rokoj.
Tamen, la scienca valoro de tiu misio estas granda, ĉar ĝi multe pliriĉigas nian komprenon pri la kondiĉoj sur Marso kaj de la analizo de ties grundo ni povos studi la geologian historion kaj kompari ĝin kun la Tero.
La bildoj kaj la novaĵoj el Marso estas haveblaj ĉe la TTT-ejo de Nasa:
http://www.jpl.nasa.gov/marsnews.
